Diséme un puochetin donde che avvien
Che la mia donna, quando vago là,
No me son cussì presto despogià
Che la me peta le culate in sen.
Chi sarà quel dottor cussì da ben
Che, senza scudo, me consegierà
De dirghe: Anema mia, vòltate in qua,
O farghelo cussì pur me convien?
Da l'una banda el mondo è scelerà,
Che ha per cogion chi no xe sodomito,
Da l'altra è la grandezza del peccà.
Ma, perché i nostri savii ha lassà scrito
Che mai no falla chi vien consegià,
Domando mi a pi savii sto quesito.