Posso ben dir, co' za disse culù
Solo e pensoso e quel che ghe va drio,
Daspuò che son redutto a sto partìo,
Senza retratto, né vista de vu.
Signora, in conclusion, no posso più
Ch'el recordarme dei spassi da Lio,
E 'l barchizar al fresco per quel rio
Me fa vegnir tutti i spiriti sù.
Infatti, no ghe xe mazor deletto,
Piaser pi dolce, o el pi caro solazzo,
Del vardar, del servir solo e secreto.
Perda el motto sti dei, sta man, sto brazzo,
Si parto più, se no son pi che astretto,
E l'instrumento sia la forca e 'l lazzo.