Felice casa, che capisci in ti
Quanto ha el mondo de bello e de perfetto,
Camera felicissima, e più el letto
Ch'el vedé e sustenté quasi ogni dì,
Deh! perché no me è lecito cusì,
Co el pensier corre e svuola l'intelletto,
In tel vostro pi scoso e pi secreto
Vegnir un zorno e gàlderve anche mi.
Scriverìa su quei muri tanti e tanti
Versi, che l'antro e 'l liogo ove Medoro
Scrisse, resterìa scuri tutti quanti.
Cusì fosser fatti de massizzo oro,
Rimessi de rubini e de diamanti,
Co 'l merité, co ve invidio e ve honoro.