L'esser ti, co ti xe, senza cervello,
E mi bestia fottua, senza rason,
Fa che quasi ogni dì femo custion,
Ti con mi e mi per ti, co questo e quello.
Co' te vien vògia, ti me dà martello
Co 'l no vegnir, co 'l scampar dal balcon,
E mi co i sonetti e le canzon
Te intòssego, e cussì stemo in duello.
Deh! dolce, cara e bella anema mia,
No pi ste giostre, no pi ste contese,
Ma femo pase e bona compagnia.
E se 'l ciel fosse tanto descortese
Che 'l ne inclinasse a sta furfantarìa,
Fémolo almanco una o do volte al mese.