Hymne.
O Goede Iesu, uwen Naem
Sterckt ons in deughden al-te-saem:
En maeckt ons leven sonder blaem,
Ons sterven tot u rijck bequaem.
Noyt soeter sanck, noyt sulck jolijt,
Noyt oor' in't hooren soo verblijt:
Noyt ziel' en was tot eenich tijt,
Soo vreughdich als ghy Iesu zijt.
Deught, eere, macht, en danckbaerheydt,
Zy Godt van al in eeuwicheydt:
Die ons door Iesus naem bereydt.
Den Gheest, die ons ten hemel leydt. Amen.
Antiphone.
Heere, in uwen Naem maeckt ons salich.