Besonder liedeken van sinte Anna, uyt de voorgaende lof-sanghen.
V Loven wy, naer onsen staet,
Om moeder Anna, vroech en laet:
Want door den sade van u saedt,
Bevrijdt ghy ons, van allen quaedt.
O wortel, uyt de welcke groeyt
De rancke, waer aen Iesus bloeyt;
Ghy zijt die ader, waer uyt vloeyt
Die schoon Fonteyn' die't al besproeyt.
V jonst, o Anna, en 't ghebedt
Van uwe dochter onbesmet,
Moet ons af-nemen wat belet
Van te volbrenghen Iesus wet.
V Anna, zy een nieuwe vreught,
Want ghy vernieuwt der zielen jeught:
Door uwe vrucht, die om haer deucht
Ghebaert heeft hem, die 't al verheught.
Verweckt u moeders in't ghemeyn,
Eert Annam als een hemelsch greyn:
Dient haer seer neerstich maeghden reyn,
Ia alle menschen groot en cleyn.
Godt, die u moeder hebt ghe-eert,
En ons haer dienen hebt gheleert:
V mildtheydt nimmer af en keert,
Als Anna voor ons iet begheert.
V machtigh Prins zy lof van al,
Die hier zijn in dit aertsche dal:
Stiert ons door uwe weghen smal,
En hoedt ons voor der sonden val.