Ghebedt, om oprechte ootmoedigheydt in ons-selven, sachtmoedigheydt tot onsen naesten, ende vyerighe devotie tot Godt te verkrijghen.
O Alder-mildtsten Heere ende Godt, die den heylighen Ioseph met alder-diepste ootmoedigheydt, alder-soetste sachtmoedigheydt, ende alder-hooghste devotie begaeft hebt: wy bidden u uyten gront onser herten, door dese sijne volmaecktheden, dat ghy ons de selve deughden genadelijck wilt jonnen: op dat wy door volkomen kennisse onser verworpentheydt, ons-selven, als de alder-snootste aller menschen moghen verachten, alle versmaetheden ende kranckheden onser naesten sachtmoedelijck lijden, ende met vyerige devotie, alle onse gheestelijcke oeffeninghen beneerstighen. Door Christum onsen Heere uwen Soon, die met u leeft ende regneert in de eenicheyt van den heylighen Gheest, Godt, in alle eeuwen der eeuwen. Amen.
Vers.
Laet ons den Heere ghebenedijden.
Antvv.
Gode zy lof.
Vers.
De zielen der gheloovighen moeten door Godts bermherticheydt in vrede rusten.
Antvv.
Amen.