Hymne.
LAet ons aen-bidden 't hert buyghende ter aerde,
Den Heere Iesum, die van alsulcker waerde,
'T vleesch met sijn smerten heeft willich aengenomen:
Dat wy voor lijden noch sterven souden schromen:
Want in Iesus pijn en doodt is salicheyt gheleghen,
Door sijn Cruys is vasten troost voor allen noot verkreghen.
Vlucht na de gaten van desen muer, als duyven,
Wilt als serpenten, het oude vel af-schuyven:
Denckt op sijn ancxt, en op al sijn diepe wonden,
Wilt ghy wel leven, en vlieden alle sonden,
Want door Iesus lijden is Godts glory' te verwachten,
Daer in iubileren alder Heylighen ghedachten.
Eer in den hoochsten, met lof, zy Godt den Vader,
Eer sijnen Sone, die ons hoedt alle-gader:
Eer zy met vreught oock den goeden Geest van beyde,
Eer Godt Dry-vuldigh, die ons sijn rijck bereyde,
Door de liefde Iesu groot, die ons end' alle menschen
Thoont den wech tot 't eeuwich goet; daer wy in druck na wenschen. Amen.
Antiphone.
Mijn ziele is seer verschrickt, ende al mijn beenderen sijn heel ontstelt.
Vers.
De castijdinghe des vreedts was op hem.
Antvv.
Ende met sijn stramen zijnwy ghenesen.