Hymne.
ICk groet u Maeght der Maeghden kroon,
Van Davids edel saet gheboren:
Godts liefde blinckt in u seer schoon,
Voor alle vrouwen uyt-verkoren.
Ghy zijt voorsien van eeuwicheyt,
En af-ghebeelt in veel figuren:
Ghy hebt ghebaert, soo't was voorseyt,
Emanuel, Godt der naturen.
O reyne Hester! Iuditch vroom,
Rebecca, voor Godts eer sorchvuldich!
Deught-same Sara, stilt den schroom,
Van alles dat wy Godt zijn schuldigh.
O Sunamytsche Abisach,
Van wesen schoon, en rijp van zeden:
Minsame Rachel, u beklach
Verkrijgh' ons rust' aen hert en leden.
Godt boven al dry-vuldigh acht,
En wilt hem eer en dienst bethoonen:
Die Iosephes bruydt ten hemel bracht,
En heeft verciert met d'hoochste croonen. Amen.
Antiphone.
Verblijdt u met my alle-gader, die den Heere lief hebt; want doen ick cleyn was, behaeghde ick den alder-hoochsten, ende van mijn leden is Godt ende mensche gheboren.
Vers.
Salich sullen my noemen alle gheslachten.
Antvv.
Want Godt heeft aenghesien de ootmoedigheyt van sijne dienst-maghet.