Den lof-sanck van Simeon.
HEere, nu laet uwen dienaer, na u woordt in vrede.
Want mijne ooghen hebben ghesien mijnen Salich-maker.
Den welcken ghy bereyt hebt voor 't aensich van allen luyden.
Een licht tot een verlichtinghe der Heydenen, ende ter glorien uws volckx van Israel.
Glorie zy den Vader, ende den Soon, ende den heylighen Gheest.
Als't was in den beghinne, ende nu, ende altijdt, ende inde eewen der eewicheden sal wesen. Amen.
Antiphone.
De wijsheyt gheeft haer kinderen het leven, ende sy ontfanght den ghenen, die haer soecken, ende sy sal op den wech der rechtveerdicheyt voor-gaen.
Vers.
Heere verhoort mijn ghebedt.
Antvv.
Ende mijn gheroep kome tot u.