Ghebedt, om suyverheydt des herten te verkrijghen.
AEnsiet, o Heere, de suyvere bewegelijckheden ende vyerighe liefde aller uwer Heylighen tot u; ende wilt ons, om het behaghen dat ghy in die hebt, een herte suyuer van alle sonden, ydele ghedachten, twijffelachticheydt in't gheloove, ende quade begheerten, ghenadelijck jonnen: op dat wy uwe Godlijcke teghenwoordigheyt altijt, ende in alle plaetsen moghen bekennen ende eeren; ons van alle over-tredinghen uwer wet gansch vry houden, ende hier namaels de glorie van u Godlijck wesen (soo ghy den suyveren van herten belooft hebt) met eeuwighe vreught aenschouwen. Door onsen Heere Iesum Christum uwen Soon, die met u leeft ende regneert in de eenicheydt des heylighen Gheests, Godt, in alle eeuwen der eeuwen. Amen.
Vers.
Laet ons den Heere ghebenedijden.
Antvv.
Gode zy lof.
Vers.
De zielen der gheloovighen moeten door Godts bermherticheydt in vrede rusten.
Antvv.
Amen.