Ghebedt, om Christus ootmoedicheydt te moghen volghen.
O Heere Iesu, die ons aen u heylich Cruyce een volmaeckt voor-beelt aller ootmoedicheydt bewesen hebt, als ghy daer aen stervende onder de moordenaers ende vermalendijde menschen hebt willen gherekent worden: leert ons de diepte deser uwer ootmoedicheyt af-meten; ende geeft ons naer u weerdich exempel, een werckende ootmoedich herte; dat wy, om uwen wille, alle hooveerdicheyt ende eyghen behaghen moghen versaken, ons de minste ende verworpenste aller menschen achten, ende in versmaetheyt vol-komen troost ghenieten. Die met den Vader, ende den heylighen Gheest, eenen Godt, leeft ende regneert inder eeuwicheydt. Amen.