Het eyndende ghebedt.
ICk offere u, Iesv, Salich-maecker onser zielen, met ootmoedigher herten dese Ghetijden, die ick in de ghedenckenisse van u lijden t'uwer eeren gelesen hebbe: ende bidde uwe goedertierene mildtheyt, dat ghy my ende alle menschen deel-achtich wilt maecken uwer verdiensten; ende met danckbaerheydt u lijden daghelijcks doet overdencken, ende met ghestadighe lijdtsaemheydt in allen teghen spoet ter salicheydt volghen. Amen.