Besonder Liedeken voor de gheloovighe zielen.
O Godt, door uwe macht al watter is bestaet,
Laet Sathan ons tot gheender tijt vernielen:
Comt ons, door Iesus doodt, na onse doodt te baet,
En rusten laet, met u doch alle zielen.
Iesu, die door u Cruys betaeldet ons rantsoen,
En voor ons al den vrydom hebt verworven:
Wilt haest ghenadich zijn, en tot haer hulpe spoen,
Die in't gheloof met hopen zijn ghestorven.
Maria reyne maecht, en moeder sonder pijn,
Troost ons met u verdiensten en ghebeden:
De zielen moeten oock door u gheholpen zijn,
Wt het verdriet des vaghe-vyers in vreden.
Ghy Princen van Godts rijck, op uwe liefde groot
Tot Godt, en tot ons naesten, wy betrouwen:
Versoent met u ghebedt, die lijden na de doodt,
En hopen Godt met vreughde te aenschouwen.
V banden, schimpen, ancxt, u doornen, Iesu, swaer,
V bitter dranck, tot straf van onse sonden,
Verlichten die daer zijn, met hop' in't vyer een-paer:
Gunt, Iesu, haer u rijck van druck ontbonden.