Hymne.
O Medecijn der zielen,
Wy zijn swack en ghewont,
Laet u vyer al vernielen,
Wat ons maeckt onghesont:
Wilt oock op deser stont,
Dat crom is weder rechten,
En met u wijsen vont,
'T gheswil der sonden slechten.
Helpts' al die af-gheweken
Zijn van u Kerck en Wet,
Met liefde wilt ontsteken,
Die traech zijn en besmet;
Verdrijft al wat ons let,
En wilt, die naer u haecken,
Gheheel van herten net,
In heylicheyt vol-maecken.
O Schepper Godt almachtigh,
Aenhoort ons schreyen groot:
Die ons door Iesum krachtigh,
Verlost hebt vander doot.
Houdt ons in uwen schoot,
En doet ons in u rusten:
V dienen sonder stoot,
En smaecken u wellusten. Amen.
Antiphone.
Ick sal mijnen Gheest uyt-storten op u saet, ende mijn ghebenedijdinghe op u gheslachten.