Besonder liedeken van het hooch-vveerdigh sacrament des autaers: ghenomen uyt de voorgaende lof-sanghen.
MAeckt u tonghen versch ontspronghen, Tot den lof van 't vleesch en bloedt, Daer Godts Sone onghedwonghen Meed' de werelt laeft en voedt; Als een Pelicaen sijn jonghen, Die sijn borst haer open doet. 'Twoort van boven wy gheloven, Dat verschenen is al-hier: Soo dat 't bleef in 'shemels hoven, En was t'saem in ons quaertier:
Om den duyvel te beroven, Die ons hielt in sijn bestier. T'saem gheseten om te eten, Met sijn vrienden in de sael, Doen hy hadde met voor-weten, Al ghedaen na 'swets verhael, Gaf sy-selven onghemeten Voor het laetste Avont-mael. Met vier woorden, naer sijn oorden, Maeckte hy sijn vleesch van broodt: Door sijn seghen, soo-men hoorden, Wijn sijn bloedt, dat hy vergoodt: Daer de sinnen in versmoorden, Deed' 't gheloofbewijs in noodt. Vleesch seer machtich, bloedt seer crachtich, Weest altijdt ons herten pandt: Spijt ons, laeft ons, hoort ons clachtich, Al zijn wy verworpen sandt: Maeckt ons 't eeuwich goet deelachtich, In dat salich Vader-landt. Niemandt droeve dan vertoeve, Deught te soecken in dit broot: Desen most een-ieder proeve, Die den lust der sonden doot: Godt is hier tot s'knecht behoeve, Is dit niet een wonder groot? Mijn lust sterven, sinnen derven, Wil ick, Iesu, om u rijck: In u is wat ick kan erven, Buyten u is't al maer slijck: Doet mijn ziel u gheest verwerven, Spijst, en maeckt ons uws-ghelijck. Amen.
Cookies on Poetry Cove