Op de wyse: Een goet nieu Liedt heb ick bedacht.
PEriculeus is desen tijdt,2.Ti.3,1.
Hier op wilt neerstich mercken,Ephes.5,16.
Ghy die in Gods ghemeynte zijt,
De Heer wil u verstercken.
En gheven u sijns Gheestes cracht,Actor.1,5.
Dat ghy meucht overwinnen,Apoc.2,21.
En altijt houden goede wacht:1.Petr.5,8.
Wel haer, die dit versinnen.
Toont u doch cloeck in u beroopEphes.4,1.
Daer ghy zijt toe begeven,
Dan wordt voleyndet uwen loop,Ephes.6,22.
Soo Paulus heeft gheschreven.Colloss.3,18
Eens yeghelijck beroep hy stelt,1.Petr.3,1.
Den Mannen ende Vrouwen,
Waer in hy soo claerlijck vertelt,
Hoe sy haer moeten houwen.
Reyn moet 'tWijf onderdanich zijn,
Den Man, als de Ghemeente
Christo is onderdanich fijn,
Want sy is sijn ghebeente.
Iae vleesch van synen vleesche recht,Genes.2,23
Soo Moyses gaet beschryven:
Daerom moet sy houden haer recht,Matt.19,5.
Marc.10,8.En by den Man steedts blyven.
Aen geen dingen nemen oorsaeck,
Haren Man te verlaten,
Ten waer dat hy de Echte braeck,
Dit wilt ter herten vaten.
Nae dat haer Godt oock kinders gheeft,
Syr.7,25.Die moetse wel optrecken,
Sus.1,2.En die soo langhe als sy leeft,
Tot Gods vrese verwercken.
Soo ghy alsoo ghetrouwe blijft,
In alle goede wercken,
Met uwen Man oock niet en kijft,
Maer sijn gheloof gaet stercken.
1.Ti.2,15.DOCHTER ghy alsoo salich wordt,
Wel door het kinderbaren,
Houdt ghy't gheloof vast met accoort,
De Heer wil u bewaren.