Op de wyse: In een groot ongheluck ben ick ghebooren.
FOnteyne soet vol van ghenaden,Ioan.7,37.
Die overloopt tot aller tijt,
Wilt doch mijn ziele oock versaden,
Mijn Godt die gantsch barmhertich zijt.
Laet uwe barmherticheyt mercken,
Ghelijck als ghy my hebt ghemaeckt,Act.17,23.
So wilt my oock in deuchden stercken,
Tot ick ten Hemel zy gheraeckt.
KEeRT mijn hert, en wilt dat bereyden
Om te bewysen wat ick mach,
Nu wercken der barmherticheydenMat.25,35.
Aen mijnen Naesten nacht en dach.
Iae dat ick mach mijn ziele spysenIoan.6,32.
Met Hemels broot, en drincken meest
Levende water int oprysen,
Door uwen goeden heylighen gheest.
Aentrecken 'tcleydt der salicheyden,Esai.61,10
Op datse mach Heer zijn becleydt2.Cor.5,3.
Met uwer handt wilse doch leydenLuc.10,34.
In u herberghe schoon bereydt.Luc.13,32.
Naer ghesontheyt doet my verlanghen,
Besoeckt my doch in myner noot
Daer ick verstrickt ben en ghevanghen,Esai.42,9.
Verlost mijn ziele van den doot.
SOO ick dees hulp van u bevonde
Aen mijner zielen openbaer,Psal.31,6.
So soud' ick u van herten gronde,
Loven en dancken lieve Vaer.
Neemt myner waer, in u handen,
Beveel ick nu mijn ziel en lijf,
Doet mijn herte tot uwaerts branden,
Daer naer schickt Heer al mijn bedrijf.