Op de wyse: Wy moeten al in een ander Landt. HEM zy alleen lof, prijs en eer Van ons hier te samen ghegheven, Die ons nu door sijn woordt en leer, Beroept tot den eeuwighen leven Die ons wil altijdt bystaen, Met syner handt ons leyden op die baen. Met uwer handt leydt ons Heer recht, Dat wy tot ghener zyden wijcken, Maer in u weghen blyven slecht, Col.3,2.Naer 'taerdtsche gheensins om en kijcken, Apoc.21,2.Tot dat wy comen in die Stadt, O Heer, houdt ghy ons recht op desen padt. En ist dat ons swackheyt aenhanght, Om eenichsins hier te vertsaghen, Met u ghenade ons omvanght, Wilt ons op uwe handen draghen: Want ons betrouwen vast'lijck staet, Dat ghy onser t'aller tijdt gade slaet. Iae als ons aencomt hongher groot, Dat wy souden moeten verflouwen, Soo wilt ons met het Hemels broot, Ioan.6,32.Spysen, het leven t'onderhouwen: Als wy dorsten in dit ghepijn, Soo schinckt ons doch van uwen soeten wijn.
Als hem openbaert den vyant, Met synen lusten overvloedich, Soo gheeft ons cracht in teghenstant1.Petr.5,9. Om hem te overwinnen moedich Door 'tgheen dat ghy den uwen gheeft, Daer met dat hy sijn cracht verloren heeft. Naeckt en laet ons toe ghener tijdtApoc.16,15. Van deuchde, wy moesten ons schamen, Als wy meynden te zijn verblijdt, En in den Hemel te samen, Lief Heer, gheeft ons het Bruylofts cleyt,mat.22,11. En maeckt ons soo tot der Feesten bereyt. Schatten ontbreken ons, O Heer, Daer wy ons moghen op verlaten,Mat.6,20. Stiert ons herten nu even seer, Om te bewysen charitaten, Den schat vergaet dien men hier telt, Daerom de Mensche hem soo seere quelt.Matt.6,33. Soo leert ons recht het Hemelrijck Soecken, o Heer, voor alle dinghen, Op dat wy nu alsoo ghelijck, Onse pelgrimage volbringhen1.Petr.1,17. Als Borghers inden Hemel fijn, Die nu niet meer soo aerdtsch ghesint en zijn. O lieve Heer, hoe is soo smalMatt.7,13. Den wegh ten Hemelrijck te vinden, Wat zijnder stricken over al, Wat zijnder die loopen als blinden, Vervreemt van het rechte verstant,Ephes.4,18. Goet ghesicht, Heere, in ons ooghen plant. Och dat wy doch smaeckten perfeckt, Het soet bequaem Hemelsche wesen Hoe souden wy worden verschreckt, En u lief Heer van herten vresen En wachten ons van alle quaet, Want daer door men van hier ter hellen gaet.Luc.13,25.
Nu Heer, weest ghy ons hulper doch, Ghy kent ons cleyn swacke vermoghen, Wilt ghy ons nu verstercken noch, Dat sal ons herte seer verhoghen: En wy sullen ons leven lanck, V prysen, en segghen lof, eer en danck.
Cookies on Poetry Cove