Op de wyse van den 17. Psalm: Aensiet Heer 'trecht, etc. Door sesderhande merckelijcke daden Besoeckt Gode de ziele uyt ghenaden.
GOdt comt tot ons met grooter cracht, Om onse ziele te besoecken, Wy moeten nu doen als de cloecken, Spoedich aennemen wel bedacht,Ioan.1,11. Sijn vreese, want hy comt vervaerlijck Als een Richter: doet ons verstaenEsai.46,7. Wat wy van joncks hier deden saen Dat straffens weerdich is seer swaerlijck. En daer vrees comt, 'thert' wert ontstelt Berghen versetten haer met crachten,matt.17,20. 'Tzijn de hooveerdighe ghedachten, Sy scheurt de steenen met ghewelt,3.Reg.19,10. En doet verstockte herten breken, Sy heeft van aerde de virtuytEccles.1,28. Datse van ons de zond' drijft uyt, Veel is van haerder cracht te spreken. Recht als een oprecht MedicijnMatt.2,17. Comt hy ons cranckheyt te ghenesen, Schinckt ons Oly en Wijn ghepresen,Luc.10,34. Christus was soo ghesalft devijn,Esai.42,9. Ons van synen Vader ghesonden, Als wy bedroeft hier zijn ghemaeckt, Met synen troost hy tot ons naeckt, Verbindt onse stinckende wonden.
Ioan.10,11.In den wegh naer het Hemels landt, Gheleydt hy ons door dees' woestyne, Verlicht den ganck, versoet de pyne, En leydt ons daeghlijcks met der handt, Spreeckt met ons dat wy niet en slapen, Van't eeuwighe Hemelsche goet, Daer met verquickt hy ons ghemoet, Dat wy lust in het reysen rapen. Ioan.13,13.Ten vierden comt hy heel perfeckt, Als een Meester ons recht te leeren, T'onderwysen tot syner eeren Het ghene dat ons noch ontbreckt: Hy doet onse verstandt verlichten, En sterckt onse begheerte meer, D'onvolcomen betert hy seer, Gaet ons met sijn woordt onderrichten. Iae als een Coninck hy verschijnt Sap.7,11.Met all synen heerlijcke gaven, Ioan.8,36.Hy maeckt ons vry, die waren slaven, Hy brenght goet d'welck niet en verdwijnt, Dat gheeft hy in sijn Rijck te vooren, Sijn schatten sijn barmherticheyt, Nu voor all' de ghene bereyt Die sijn Conincklijcke stem hooren. Als een Bruydegom comt hy noch, Om ons in liefde doen te branden, Ontsteeckt dit vyer met synen handen Al gheheel reyn sonder bedroch, Mat.25,6.Hy comt, staet op wilt hem ontfanghen, Ons arme ziele neemt hy aen, 'Tis wonderlijck van hem ghedaen, Omhalst hem doch met groot verlanghen. Luce 21,23.Naer desen sal hy comen voort Verschricklijck datse sullen beven Die hem nu niet (hier in dit leven) Hebben ontfanghen soo't behoort,
Sy moeten dan, die nu niet willen, Synen woorde ghehoorsaem zijn, Als hy seyt: gaet nu in die pijn, Die dan nemmermeer en sal stillen. Siet toe dat ghy, wat hy aenbiet, Niet en veracht om aerdsche saken,Matt.22,5. Wat sult ghy anders naemaels maken, Vercrijcht ghy het Hemelrijck niet, Maer mee wilt ghy u ziel bevryden? Dus neemt nu Gods ghenade waer, V aengheboden allegaer, Soo meucht ghy dan met Godt verblyden.
Cookies on Poetry Cove