Op de wyse: van den 129. Ps. Van der jeucht aen hebben sy my ghequelt.
HEere Godt stort doch uwen heyl'gen geest
Op uwen knecht, na u goet welbehagen
Dat hy u woordt vrymoedich, onbevreest,
Mach uytspreken, vercondighen, voordragen.
Na u goetheyt, lecht dat in synen mont
Roert aen sijn tong', wilt sijn lippen bespraken
Dat hy u vrientlijckheyt mach maken kondt,
En u gherechticheyt in alle saken
RYCKlijc begaeft hem met uwer wijsheyt
Die een besitster is van uwen throone
Sendt die in hem, ghenadich uytghebreyt,
Wt uwen hooghen Hemel alsoo schoone.
IA Neemt van hem menschlijcke blodicheyt
En deur u cracht sterckt hem (o Heer) in desen
Maeckt hem vrymoedich deur u goedicheyt,
Dat uwen naem seer hoogh worde ghepresen.
Schenckt hem doch u heerlijcke gaven goet
Om u heylich Woordt recht te onderscheyden,
Dat wy daer deur ghespijst, worden ghevoet
Als rechte Schapen, Heere, uwer weyden.
SCHVLdich zijn wy te prysen uwer naem
Van dennen ons comt alle goet te samen
Laet doch (o Heer) stelt ons beed' bequaem
Door Iesum Christum nu doch worden Amen.