Op de wyse: Tobias tot sterven genegen, etc.
VOOR een leere wilt doch ontfanghen,
Hoe ghy u jeuchdelijcke ganghen,
Nu fier // sult hier // deurbrenghen spoedich,
Nae Gods wil goedich.
LIIF en ziele wilt doch begheven
Gods Rijck te soecken in u leven
Wilt ghy, hoort my, het selve winnen,Matt.6,33
Moet ghy beginnen.Eccle.17,21
Slecht ende recht u nu te keeren
Van der Weerelt, en het begheeren,
Den zin, niet min, daer op te setten
Sonder beletten.
BETrachten met een wesen stille,
Dat nu alleen zy uwen wille,
Verneert, ghekeert, om te volbringhenMatt.18,3.
Hemelsche dinghen.
HEYMElijck in 'thert' moet zijn desen
Goeden wille, met Godes vresen,Luce.2,14.
Godt siet, bespiet, daer op aendachtich
Helpt voort waerachtich.
Eccles.2,20Recht moet men 'therte hier bereyden
Tot den Rijcke Gods sonder beyden,
Den gront, terstont, doet hier van open,
Wilt ghy vast hopen.
Int hert bemint Gods Rijck gheduyrich
1.Ioan.2,15Boven dees Weerelt onghestuyrich
Die haest, verbaest, en comt ten ende
Met groot ellende.
Continueert in dese saken,
Ghy sult int Rijcke Gods gheraken,
Afslaet, noch laet, u niet vermoeyen,
Maer wilt u spoeyen.
Keert al u saken als die cloecken,
Die nu het Rijcke Gods hier soecken,
Luce,9,60.Den ploech, nu vroech, houdt desghelijcken
Sonder omkijcken.
Soo sult ghy int Rijcke Gods comen,
En daerin woonen met den vroomen
Nu in, den zin, en gheeft ghepresen
Namaels int wesen.