Den veerthienden stichtsanck, op de wijse van den 9. Psal. Heer ick wil v wt sherten, &c.
1 GOd heeft zijn volck verworpen niet, 2 Dat hy te voren kende: siet Wat van Helia spreect schriftuere, Bedroeft zijnde ter selfder ure.
3 Heere sy hebben hier ghedoot De Propheten: en wt gheroot Vwe altaren daer beneuen, Ick ben alleen ouer ghebleuen.
4 VVat antwoort is tot hem gheschiet, Noch seuen duysent mans ick liet, Die haer knien niet hebben gheboghen Voor Baals beelt [hooch op ghetoghen.]
5 Diesghelijcx is tot deser tijt, Een ouerblijfsel hier gheurijt Door God die hen niet en versmade, Na de verkiesingh' der ghenade.
6 Ist wt ghenad' so ick aenmerck,
So en ist dan niet wt het werck, Anders so en can oock door desen, Ghenade gheen ghenade wesen.
Ist dan hier door wercken volbrocht, So heeft ghenade niet ghewrocht: Anders en is het werck [ghebleken] Nv gheen werck alsmen recht sal spreken.
7 Dat Israel hier heeft ghesocht, Vercreegh hy niet, maer onbedocht Ist van vercoorne hier vercreghen, D'ander bleuen verhart daer teghen.
8 Ghelijck schriftuere ons verclaert, God gaf haer eenen gheest beswaert, Ooghen op dat sy niet en saghen, Ooren sonder tghehoor [tzijn plaghen.]
9 Haer tafel werde hen daer op, Tot eenen strick en eenen strop, Oock erghernisse [diep om gronden] En tot vergeldinghe der sonden.
10 Haer ooghen die laet werden hier Verduystert [door haer quaet bestier] Op dat sy hier niet sien en moghen, Den rugghe sy altijt gheboghen.
11 Struyckelden sy hier dan alleen, Op dat sy vallen souden? neen: Maer door tmisvallen vanden Joden, Is salicheyt hier aen gheboden
Den Heydenen, daer sy op strect, Op dat elck Jode wert verwect Hen na te volghen int ghelooue, [Ende in Gods woort niet sy dooue.]
12 Is haren val der werelt schat,
Doet haer verminderinghe: dat Den Heydenen rijckdom can comen, Hoe wert veruullingh' dan ghenomen?
13 Den Heydenen seg ick dit claer, So verre ick ben hen dienaer: Op dat ick mijn De Joden acht hy voor zijn vleesche.vleesch trecken soude, En eenighe van hen behoude.
15 VVant ist dat haer verworpingh' hert, Tswerelts versoeninghe hier wert, Wat is dan t'aennemen en nooden, Anders den tleuen wt den dooden?
16 Sijn d'eerstelinghen heylich dan, De maffe oock sulcx wesen can: Want is de wortel hier nv heylich, So oock de tacken [nv onueylich.]
17 Ist dat sommighe tacken zijn Ghebroken, en op dit termijn, Ghy zijt ghegriffijt in die stede, En tsbooms vet zijt deelachtich mede.
18 So en wilt v beroemen niet, Want doet ghy dat: dit vry doorsiet, Ghy draecht de wortel t'gheenen daghen, Maer de wortel die moet v draghen.
19 Segt niet sy braken [tot ghewin] Om my te griffien daer in: 20 Dus cost hier onghelooue treffen: Vreest, maer en wilt v niet verheffen.
21 Spaerde God niet tsnatueren aert, Siet toe dat ghy niet wert ghespaert. 22 Daeromme siet wel in met vroetheyt, Gods strengicheyt ende zijn goetheyt.
Strengicheyt op den Joden nv,
En goedertierenheyt op v, So verd' ghy blijft in vast betrouwen, Anders wort ghy oock af ghehouwen.
23 Ende sy sullen niet der daet Verlatende tongheloof quaet, Weer inghegriffijt worden crachtich, Want diese griffijt is almachtich.
24 So ghy van eenen boome wilt, Ghehouwen zijt: en goetheyt milt V stelt inden olijfboom pure, Hoe veel meer diet zijn van natuere.
Cookies on Poetry Cove