Den achtsten stichtsanck wt den selfden Capittel, op de wijse van den 112. Psalm. Wel hem die altijt is begheuen.
14 WY weten dat de wet van Gode, Gheestelijck is inden gebode, Vleeschlijck ben ic sondich van state, [Maer in de daet leyt het geschille,] 15 Want ick en doe niet dat ic wille, Maer
ick doe altijt dat ick hate.
16 Ist dat ick doe t'eenighen tijde, Dat ick niet en wil, ick belijde De wet voor goet [al ben ick clachtich:] 17 So doe ict niet meer dan by name De sonde in mijnen lichame, 18 Want gheen goet is in tvleesch woonachtich.
Ick heb den wille tot veel dinghen, 19 Maer om het goet hier te volbringhen En vind' ick niet: want wil tot goede En doe ick niet, tot gheender uren, Maer tquaet dat ick niet soud' volvuren, Dat doe ick, tvleesch is sulcx niet vroede.
20 Doe ick dan sulcx t'eenighen stonde, So doe ick dat niet, maer de sonde, [Daer ick hier mede ben ontfanghen:] 21 Een wet in my can ick beuinden, Als ick my tgoet wil onderwinden, Datmen my tquade siet aen hanghen.
22 VVant ick heb lust met tsherten wensche Aen de wet Godes na den mensche, Die my inwendich brengt verblijen: 23 Maer ick sie in my oock verspreden Een ander wet in mijnen leden, Teghen tgemoets wet can sy strijen.
Dees can my hier in seer veel saken, Der sonden wet gheuanghen maken, Die in mijn leden is niet traghe. 24 Ick mensche die daer ben ellendich, Wie verlost my [ick roep onendich] Van sdoots lichaem het welck ick draghe.
25 Ick dancke God den vader seere, Door Jesum Christum onsen Heere, Dien' oock Gods wet met den ghemoede. 26 Met het vleesch sietmen my aencleuen De wet der sonden in dit leuen, Ten sy dat my de Heer behoede.
Cookies on Poetry Cove