Zwabische tekst.
1.
Ungelich stet uns der muot
Mir und dien kleinen walt vogelinen,
Wan si vröuwent sich der bluot,
Die s'uz den esten sehent schinen,
Dar under si wellent ruowen disen kuelen meien
Und erniuwen ir gesank und ir geschreien.
Iemer dienen sunder lon, dast jamerlich.
Wisset ir, wer daz hat getan? seht, daz bin ich.
2.
Ich wil iemer bliben staete
Und enwil ir nicht entwenken;
Lont si mir mit missetaete
We, wes sol ich dan gedenken?
Nein, vrouwe Venus, laz erbarmen dich
Unt bite die lieben, daz si troeste mich.
Iemer dienen, u.s.w.
3.
Ich muoz iemer tragen kwale,
Naht unt tag unt z'allen stunden;
Daz tuot mir ir minnestrale,
Diu ervrischet mine wunden;
Die stent unverbunden, dast al ze hart:
Nu alrerst so jage ich uf der widervart.
Iemer dienen, u.s.w.