X Schin.
My hebben seer veruolght de vorsten prat
Sonder oorsaeck, doch buyten eenich schromen
Heb ick dyn woordt steits in eeren ghehadt.
Wt dyn woord heb ick sulcke vrueghd bekomen,
Als yemand wt eenen buyte seer goed
Of schatte groot soude moghen bekomen.
Lueghens ende valscheyt hat’ ick ghewis,
End hebber af eenen grouwel van deghen:
Mer dyn Wet my seer lief ende werdt is.
Seuen mael s’ daeghs dynen lof onuersweghen
Singh’ ick, o Heer, om der gherichten wil
Dynr gherechtheyt, die du toonst alle weghen
Ueel vredes is voorwaer den toebereydt,
Die daer dyn Wet lief hebben, end sy werden
Hen niet stooten tot eenigherley leydt.
O Heer langh heb ick verhoopt, met volherden,
Op dyn bystandt, houdend’ wt vry ghemoedt
Dyn gheboden die daer syn groot van werden.
Myn siel heeft dyn tuyghnissen bewaert styf,
Met een ontsicht deselue te verkleynen:
Want ick hebse van herten gronde lief.
Dyn gheboden end tuygnissen ghemeyne
Heb ick bewaert, want alle weghen myn
Syn wel bekent voor dynen ooghen reyne.