Beati omnes qui timent Dominum
I. V.
De vreese ende gehoorsaemheydt Gods, is t’beginsel aller voorspoedt in den huwelicken staet. Salich is hy bedeghen,
So wie den Heere vreest,
End wandelt in syn weghen,
Rechtsinnigh in den gheest:
Den arbeydt dyner handen
Dy wel sal konnen voen,
End sulst in alle standen,
Spoedich zijn in dijn doen.
DE vruchtbaerheyt der kinderen. Dijn wijf sal vruchtbaer wesen,
Als wijnstocken vruchtbaer,
Die dynen huyse ankleuen:
So zullen oock voorwaer,
Dyne kinderen beklijuen,
In groot ghetal ghesondt,
Als planten van Olijuen,
Ouer dijn tafel rondt.
Die goddelick leuen in den huwelicken staet, ontfangen gheestlicke ende wtwendige gauen van God. So sal bespoedight wesen,
Die Godt ten rechten dient,
Wt Sion God ghepresen,
Dy saligh maecken wilt,
Op dat du gantz dijn leuen,
T’voorspoet Hierusalem,
Aenschout end daer beneuen,
God prijst mit hert end stemm.
End sulst wt dynen zade,
Dobbel gheslachte sien,
In Israel ghenade,
End vrede bouen dien:
Dy sy O Heere ghepresen,
Lof in der eewigheydt,
Gheeft dat wy moghen wesen,
Tot dynen dienst bereydt.