Symbolum Apostolorum. Wy gheloouen in eenen God alleyn, Schepper des hemels en der aerden, Die Ua-der is ons aller ghemeyn, End laet ons zijn kinderen werden, Hy wil ons altijdt gheneeren, Lijf end siel oock wel bewaren, All ongheual wil hy weeren, Gheen leedt sal ons teghen varen, Hy sorght end waeckt voor ons, dagh en nacht Alle dinghen staen in zijnder macht.
Wy gheloouen in Christum alle ghelijck, Synen Sone end onsen Heere, Erfachtigh in zijns Uaders rijck, Ghelyck Godt van macht ende eere. Uan die reyne maeght Marie, Een waerachtigh mensch gheboren, Door Gods gheest, na t’schrifts belijden, Voor ons door de sonde verloren, Aen’t cruys ghestoruen, end gheleyt, In’t graf tot zijns doods sekerheyt.
Ten derden daghe om ons’ gherechtigheyt, Uan den dooden is opghestanden, Door s’vaders kracht in heerlickheyt, Uerlossende ons wt s’viandts banden, Is ten Hemel op verheuen, Uan der aerden in’t openbare, Sitt ter rechter handt Gods beneuen, Uoor ons een recht middelare, Uan waer hy ten eynde, komen sal, Richten leuende ende dooden al.
Wy gheloouen in den heylighen Gheest, God mit den Uader ende den Sone, Die ons troost end maeckt onbeureest, En cieret mit gauen schoone, Die gantze Christenheyt verheuen, Tot een eenigheydt begheuen, Dien de sonden zijn vergheuen, Dat vleesch sal noch weder leuen, Na desen iammer, is bereyt, Ons een leuen in eewigheyt.
Cookies on Poetry Cove