Na de Stemme: Onlanghst vroegh in het Morghen-root. GHeeft nu te samen Lof en prijs Den Heere der Heyrscharen, Met Keelen, Psalters, Snaren, Die ons als in een Paradijs Hier heeft soo langhe Iaren Bevryt voor drucks beswaeren, Voor het Spaensche ghebroet, Enckel bitter als roet, 't Welck doch niemant en doet, Dan tyranny onsoet, Elck hem van zonden boet, Godt sal ons noch bevvaren. Heft op demoed'ghe handen doch Ghy trouwe Batavieren, Burghers, en die regieren, Eer dat u weder-vaert bedroch Van die bloedt-dorste gieren, Die om u heenen swieren, Groot en cleyne neempt acht, V van twisten doch vvacht, Houdet Vreed'en Eendracht, Want Eendracht die maeckt macht, Bidt Godt dach ende nacht, Dyn wensch sal hy u stieren. V Overheyt vveest onderdaen, Gheensints u laet bekooren Van die haer flucx verstooren Alsmen hier strijdt moet vanghen aen,
Dat men u leydt te vooren Schattingh om Kryghs-oorbooren Maeckt gheen quest, maer als Helt Onderrecht, die daer schelt, 's Lants Regenten ghestelt, Want Schriftuer die vermelt Weest onderdaen 'tghewelt, Wederstaet niet met tooren. Hoe salmen Godt te vol ghenoegh Loven met hert en tonghen, Die voor ons Oud' en Ionghen Dus langhe Iaren spaed en vroegh Ons vyant heeft ghedwonghen, Lof moet hem zyn ghesonghen, Want tot huyden men siet Ons zyn jonst is gheschiet, En ons vyant verdriet, Al haer dreyghen acht niet, Volght 'tGoddelijck ghebiet, Schrickt niet wort ghy ghedronghen Besluyt Gheeft onsen PRINS naest Gode lof, Door zyn regieringh goedigh Is Godt ons dus behoedigh, Hy schickt ons Prins en Raedt in't Hof, Harten als Leeuwen moedigh Teghen het oorlogh bloedigh Door d'Eendrachtighe hant Sietmen aen elcken cant Wordt ghestut den vyant Langh blyf ons Vaderlant In Eendrachts-bant voorspoedigh. Aenmerckt den zin. In Liefd' werckende.
Cookies on Poetry Cove