Liedeken, Op de Wyse: Laet ons den Heere loven, Prijst zyn Almachtigheydt. 1. MEt recht machmen wel prysen D'aenghename Eendracht, Want zy ons gaet bewysen Haer sterckheyt groot in macht, Niet en mach meerder krencken Als tweedracht boos van aert, Laet ons daer wel op dencken So blijft vrede bewaert.
2. Het is een grooten zeghen Waer dat de Vrede woont, Eendracht wert daer vercreghen Die oock lieffelijck loont, Sy daelt van boven neder Tot rust naer onse wensch, En bloeyt ghelijck den Ceder Verquickt den goeden Mensch.
3. Twedracht maect boos en nydig Den Mensch wat hy begint, Dies hy't verderf ontydigh Haest in zijn selven vint, Eendracht die doet vergeten Al 't leet wel eer gheschiet, Wil daer niet meer of weten, Acht het ghelijck als niet.
4. De gulde Eendracht vreugdigh Lang by ons blyven moet, Dit is ons wenschen deughdigh Dat tweedracht onder voet Gheheel mach zijn vertreden, Op dat de herten trou Roepen met goede reden Leeft wel ghemoet Nassou.
Prince.
Prins dus is nut seer goedigh Dat blyft aen elcken cant Des Eendrachtsbant voorspoedig Lang in ons Vaderlant, So sal de Vrede blyven By yeder een ontrent, Die vreughde can verstyven Als Liefd'es 'tFondament. Liefd' es 'tFondament. Trou baert vrientschap.
Cookies on Poetry Cove