Knie-werck, Op de Vraghe: Wat vvijsheydt meest tot Lof de Reen-Vrou baren can? HA! Minnaers vande Maeghd', Levender schoone bloem, Hoe soeckt ghy 't waerde Lof van u end' ons vriendinne, Ghy soeckt de wijsheydt selfs, die haer den meesten roem Haelt uyt een yeders mondt, baert in een yeders zinnen. Voor eerst, hier schuylt haer Lof, dat al die haer beminnen Door kennis vande re'en, de reed'lijckheyt voldoen, Want alsmen blood'lijck sal Re'en-lievers naem bevinnen, Wat helpt, 'tgaet elck sich tot gheen Re'ens-betrachtingh spoen, Van 'tgheen hy and'ren leert, het sal den laster voen, Maer als zijn eyghen werck comt met zijn Leer vereenen, So sal de Reden-Vrou daer duysenden op woen Ghenieten Lof end' Prijs, die by nae is verdweenen: Ten and'ren is den roem Rethoricas verscheenen, Wanneermen'tnoodigh nut met vreughden leeren kan, En met Orphei Harp, de harten hart als Steenen Met't Snaren-spel beweeght, en sachjes haer treckt van D'heyloosen wandel-pat. Ha! waerde kenniss' dan Die in betrachtingh' brald', end' weet door konst te stichten 't Verwoest 't onreed'lijck Volck, dat met meest alle man Meer op het leven ziet, dan op Leer end' Ghedichten Des Leeraers leven self sal meer als Leer verlichten, End' leert hy 't nutt' met vreughd' dat is meest elcks begheert, Dees wijsheyt sal dan 'tLof van d'Re'en-Vrou meest oprichten, Dat men met weldoen sticht, en 't nut met vreughden leert.
Aensiet Liefd'. Sticht of svvyght, C.I. van Aerd.
Cookies on Poetry Cove