Olympiados D.I. vander Noot lib. V.
Sonet.
Dan ben ick een half Godt, wanneer-ick ben geseten
By mijn Meestersse goedt, en daer so med gemake
Heur goey maniren sie, en hoore heur sute wt-sprake,
Die dan ooc altemedt gebroken, en vergheten
Wordt, med een suet gelach, oft suchten quaet om weten.
In heur schoon ooghen suet daer ic altijdt na hake
Mercke ick de liefde reyn, die maect dat ick dus blake,
Die my euen gedicht' deurwondt na sijn vermeten.
Ken ben mijns sins gheen heer' wanneer ick heb' ghesogen
Het bitter suet verghift wt heur sute bruyn ooghen
Dwelc my betoouert heeft, en houdt euen gedichte.
Ic ontfang' meerder vreugt med heur oogen t'aenschouwen
Dan deur slaep', spijse, oft dranc, om d'lichaem t'onderhouwen.
Soo wel behaghen my heur deught en eerbaer wesen.