Sinne-beeldt. Eenen Esel-dryver, die door slaghen synen Esel ende Hondt wilt doen drincken. Te vergheefs ghy tiert, en slaet, Noyt en drinckt hy boven maet. FObben waer toe soo gheslaghen, Esels die de packen draghen, Oorsaeck zyn van goede winst, Menschen doen soo grooten dinst? En Trouvé die uwe waeren Met u huys snachts moet bewaeren, VVaerom wordt den lieven Hondt Door uw' stocken soo ghewondt? VVilt ghy door uw' smyten, tieren, Misschien dwinghen dese dieren, VVilt je hebben, als ghy slaet, Dat sy drincken boven maet? Fobben werpt vry uyt uw' handen, Stocken, sweepen, ende banden; Onbewust is uwe daedt, Ghy volght rechten Esels raedt.
Eerder sult ghy dese dieren Doodt slaen, als hun daer toe stieren; Esels, Honden van de straet, Drincken nimmer boven maet. Dat hun schaemen de ghesellen, Die het vat gheduerigh quellen, Altydt swert en droncken zyn, Oft door 't bier, oft door den wyn. VViëns kaeken, wiëns wanghen, Ghelyck slappe vodden hanghen, VViëns aensicht is heel gheel, Bleeck oft wit ghelyck het meel. VViëns voeten sich begheven, VViëns handen altydt beven, VViëns mondt, en adem stinckt, Naer het nat, het welck hy drinckt. Dat dees' Dronckaerts al-te-saemen, Seggh' ick wederom sich schaemen, Siet een stom, onred'lyck dier, Leert hun nutten wyn en bier. Leert hun roomers en ghelasen Naer behooren hier uyt-blasen, s'Morghens vroegh en s'avondts laet, Houden in het drincken maet. Godt die heeft den wyn gheschaepen, Om daer voedtsel uyt te raepen, Om te leven lanck ghesondt, Is dit edel nat gheiont. Niet om onse ionghe daghen Te verkorten door het draghen
Van een stoopken oft twee nat, En alsoo te loopen sat. Malsche bieren, Fransche teughen Moghen ons wel wat verheughen; Droncken drincken vroegh oft laet. Is een beestelycke daet.
Cookies on Poetry Cove