Emblema. Sclopetum adductum.
Tangar, inardescam.DEsine, quid video? Sclopetum desine demens
Articulo vel tangere parvo.
Leniter adductum est, attactum leniter ardet,
Atque truces mox evomit ignes.
Tangere desistas subitò violentia mentis
Quorum gliscit & impetus irae.
Sunt Fatui tales; verbum si dixeris illis
Sit lepidum, quod displicet, ullum.
Dentibus infrendent, pallent, spumantque;, fremuntque;,
Bile tument, stomachantur in omnes.
Exoptant gladios, pugnam committere, stultae
Mille vomunt convicia linguae.
Latrant, exclamant circum se more canino,
Quin Tigres tibi credis adesse.
O Malè sana cohors, Fatuorum digna cucullo!
Gens Mimi ridenda cavillis!
Percita tam subitò compescite pectora; pravè
Nè sectum stomachemini ob unguem.