Den voorgaenden brief bestaende, volghende de afdeelingen hier voren, van drientwintich volschreven reghelen, ende omtrent een derdepaert, was gheschreven op een stuck franchijns, lang omtrent acht duymen, achtalf greyn: hooch vier duymen, drie greynen, behalven een ploye van omtrent zeven greynen, ende bezeghelt aen double franchijnen staerten, al tot vijf plaetsen door de ploye gesteecken, mit vijf groen wasschen zeghelen.
Het eerste van den Borchgrave, hooch in zijn dwers-linie omtrent neghendalve greynen: daer inne afghedruct stont een ghequartilleert schildeken zonder helm ofte tymber, bezet ter rechter hant mit drie halve manen, ende ter slincker hant mit een dwers-lopende balck: hebbende in zijn ommeloop (die tot twee plaetsen gebroocken was) noch deze letteren S. THE . . . . SSENKASTELL . . . . MILITIS.
Het tweede van Wateringhen, hooch omtrent zevendalve greynen, daer in af gedruct stont een staende schildeken, bezet mit een achtpointighe sterre onder een bare, hebbende in den ommeloop deze letteren S. WILLELMI DE WATERINGE MILITIS.
Het derde van Heerman: hooch omtrent zes greynen, daer inne af gedruct stondt een schildeken, bezet mit een cruys, aende vier eynden, ommegecromt in fanctsoen vande Lelien bladen, ende in den ommeloop S. WILHELMI HEER-MAN.
Het vierde van Ougstgheest: hooch omtrent zestalf greyn, daer inne af ghedruct stont een schildeken, bezet mit een cruys, als voren, hebbende in den ommeloop S. GHERAERD VAN OESTGHEEST.
Ende het vijfde van Oem, groot in zijn dwers-linie omtrent vijftalve greynen, daer inne af ghedruct stont een cleyn schildeken, bezet mit drie manen: hebbende een bastoen, ende in den ommeloop S. IANS OEM.
Zodanich was de vriendelicke ende gonstighe quijtscheldinghe van den Burchgrave mit zijnen ondersaten, der gemeenre stede van Leyden, ten overstaen, ende by tusschen-spraecke, niet alleen van zijnen hier boven genoemden, maer van noch veel liever ende vast-bindender maghen ende vrienden: om twelck beter te begrijpen, zalmen naerder ende claerder onderrechtinghe becomen uyte quitantien hier inne ghelijft.
Cookies on Poetry Cove