Rosette.
Wanneer een vuyle tocht in lust soeckt te begaen,
Soo isser gheen meer lust, als lust te weder staen;
Niet ken een Christen Ziel, soo goddelijck vermaecken
Als in een reyne gheest de lusten te versaecken:
Daer werdt geen soeter vreucht de Zielen op geleydt,
Als daer men vleesch-lust vlied, en leeft in suyverheyt
Hoe ken de Ziel doch sijn gequetst met swaerder wonden
Als is een vuyl vergif van goddeloose sonden:
Waer ken de Ed'le Ziel meer glory meed' begaen,
Als toghten van het vleesch in deughd' te weder staen
Wat ken de Ed'le Ziel met meerder vuyl besmetten,
Als een godlose lust van onbeschofte hetten?
Gheluckich is de Ziel die sulcke laghen mijdt,
Waer toe dat nodich is, een Christelijcke strijdt.