Ghebedt, het gheheele tractaet des boecks behelsende ende versoeckende.
O Goedertierenste ende ghenadighste Heere Iesu Christe, die v seluen soo minnelijck inder booser menschen handen gheleuert hebt, om veur ons ghevonnist ende ghecruyst te worden: Wy bidden v, deur die pure onnooselheydt uwer sielen, ende de onsprekelijcke pijnen uwer passien, ende doodt uwes onbevleckts lichaems, dat ghy ons gratie en wijsheydt geuen wilt, van in tijdts te sien, en wel t'aenmercken, wat ons te doen en te laten staet, om uwe goddelijcke maiesteyt te ghelieuen: ende daer by oock eenen wille, ende sterckte te verleenen, om al t'selue wel en ghestadelijck metten wercke te vol-brenghen. Op dat wy, deur een goedt, deughdelijck, en heyligh leuen, moghen deur de Doodt ende Ordeel (bevrijdt wesende vanden in-ganck der Hellen) comen deur v gratie ten Eeuwighe leuen. Amen. Amen.