Rolle der devgdsaemheydt:Tot naer-volghinghe Christi op den Christelijcken Waerseggher dienende.Met een verworpinghe van alderley superstitieuse ende ongoddelijck vermaeckelijckheydt.
Veur-reden.
GHelijck een vermaerdt schilder, ten besten ende naer d'leuen nae-belden moet, het ghene dat hy veur-ghenomen heeft, uytter const naer te maecken: Al-soo moet een Christen mensche Christum in sijn leuen ende conuersatie nae-volghen, naer den eysch sijns naems (Christen,) ende des wercks, d'welck hy aenghenomen heeft te maecken, tot dat Christus in hem gheformeert zij: soo S. Paulus sprekt: ende soo inden Christelycken WaerseggherGal.4. verhaelt staet, op de xv. Vraghe.
Tot dese nae-beldinghe Christi in ons, dient al dat eenen Christenen helpen magh, om wel ende deughdelijck te leuen, ende in sijn manieren van doen Christum naer te volghen, ende (om soo te segghen) te contrefaiten. Ende ghelijck de veur-noemde Waerseggher met de figuren ende bediedtselen, tot desen eynde, den goeden Leser veur ghehouden werdt: alsoo dient oock hier toe, dese nae-volgende Rolle oft keer-spel, met dese haere instructie, ende op-recht ghebruyck.