XI.
Als ick eerstmael aensach u blondt verguldigh hajr,
De groote soetigheydt, die wt u ooghen straelde,
De lipkens roosen-roodt, daer liefd' haer rijck bepaelde,
Met al 'tghen', dat mijn hert op u ontstack een-paer;
Soo meynd' ick, Ionckvrouw soet, dat schoonheyt was voorwaer
Het grootste, dat in u oyt van den Hemel daelde;
Want al u ander deught voor mijn ghesichte faelde,
Al veel te seer ghewoon dat licht t'aenschouwen claer:
Maer weynigh naderhandt dat hoogh verstandt ghepresen
Vertoond' hem soo, dat 'tmy in twijfel dede wesen,
Oft hem de eerste plaets met recht niet toe en quam.
Wie groot't is, wet' ick niet, ick weet wel, sy ghelijcken
Malcanderen seer naer; en wet', dat sekerlijcken
Noyt schoonheydt, noch verstandt tot dees volmaecktheydt clam.