Spiegelboeck

Hier vvort vanden Dichtstelder verhaelt vvat inde vijfde gheschiedenis volghen sal, ghestelt in Refereyn-dicht van derthien Syllaben.

Den Dichtstelder. Ghy hebt ghesien wat den, overwinner vermach,, al, Als hy met ghewelt heeft, ghecreghen de overhant, Hy en acht tranen, noch, bidden, noch al 'tgheclach,, smal, Hem dunct dat hem al is, gheoorloft, roof, moort en brant, Hy en ontsiet noch God, Duyvel, noch des werelts schant, Polixenas onschult, mocht Pyrrum niet beweghen, Vlisses brocht het kint, ter doot, noyt wreeder int lant, Man, noch vrou, cleyn noch groot, heefter ghenaed' ghecreghen. Nu sult ghy sien, doet slechts, d'ooghen open ter deghen, Hoe dat zijt met de arm, verlaten vrouwen maken, Sy doen alle ghelijck, als ander wreede pleghen, Sy en achten gants gheen, onteeren oft ontschaken, Maechden van elf oft twaelf, jaer al tot schande raken, En gaen noch voor het lest, het lot worpen en spelen Elck om een, beter waert, dat sy haer ras doot staken, Dan dat zijt moeten al, haer leefdaghen bequelen: Wie en sou doch al dees, wreetheyt niet gants vervelen,

Wie en waer liever niet, doot dan in sulck ellenden, Helena coemt terstont, die en sal ons niet helen, Het ongheluck dat de, Goden hier nu toe senden, Aen Andromache, en, Hecuba, met haer benden, Vlisses die crijcht d'een, en Pyrrus die crijcht d'ander, Agamemnon die neemt, Cassandra om te schenden, Hy spieghelt hem saecht die, hem spieghelt aen een ander.