Nunquam deformis amica est.
DVlcis amor furor est. Stupet ebria simia prolem,
Nilque suis catulis pulchrius esse putat.
Nescit amans vitium (nimis id licet exstet) amicę,
Quasque alius dotes non videt, ipse notat:
Fucus amor vehemens, omnique potentior herbâ est;
Hoc duce, facundę garrula nomen habet.
Quisquis amat, mentes agitante Cupidinis oestro,
Omne bono vitium proximiore tegit.