Gaudendum cum gaudentibus.
APta chelys tremulo testatur gaudia motu,
Vt socię similem sentit inesse sonum.
Barbarus est, si quis mortalia corda flagellat,
Alterius lętâ conditione, dolor.
Disce tuas lachrimas lachrimis miscere sodalis,
Quisquis es, alterius gaudia disce sequi;
Nec satis hoc, sed sponte iuva, sed provehe coepta,
Et facilem placidis vultibus adde manum.