Her grodde det eigong den vænaste Skog
med Bjørkur og Rannar og Heggjer;
men flaumville Vaarnatt dei naadelaust vog
dei brotna dei sterkaste Leggjer.
Dei stod her so rake og tøygde seg upp;
dei lyfte so sjølvtrygge Nakken;
men Skreda ho bøygde kvar sprettande Knupp
og lagde dei gruve i Bakken.
No ligg dei her ferja av Grus og av Stein
og fulle av Flengjur so djupe;
flest alle dei hever si gildaste Grein
i Grjote der ned under Stupe.
Men Live det strider so lenge det kan
og gjev seg kje fyrr enn det nøyedst.
Og Voner han hever den armaste Mann
til seinaste Livsgneisten øydest.
Di sprett og fraa Nyo den nedbrotne Skog,
di glytter og Blad attmed Saari.
Di vil det nok henda, at Skreda her drog
vil løynast av Vokstrar med Aari.
Alt livande hever det sjølvsame Lag,
det vil seg med Lagnaden sona;
og um enn me tapar i Slag etter Slag
me stendugt paa Sigeren vona'.