Den xcj. Psalm Die in Godes bewaringh sterck, Begeeft hem onbesweken, Die woondt in een vast bollewerck, Dies hy seer wel mach spreken, En segghen by hem t’aller stont, Godt is mijn hulpe krachtich, Mijn borght en oock mijn vaste gront, Daer ick op hoop eendrachtigh. 2. Van des Iaghers val-stricken al, En van ‘t ghewelt seer machtigh, Van schaedelijcke Pesten sal Hy u oock helpen krachtigh. Hy sal met den vleughelen fijn,
U decken en bevrijden, Sijn hulp sal u u noot en pijn, Een schilt zijn t’allen tijden. 3. ‘s Nachts sult gy dat ding vreesen niet Dat de menschen doet beven, Noch de pijlen die ‘s daeghs met vliet Gheschoten zijn daer neven. Oock voor geen sterven scherp noch groot Dat ‘t volck des ‘s nachts bespringet. Noch voor ‘t haestighe, ‘t welck de doodt Den menschen ‘s daeghs toe-bringet. 4. Al storven aen u slincker zijdt Duysent, en thien duys’ t’same, Ter rechter, noch zijt ghy bevrijdt Voor schaden onbequame. Ghy sult onbevreest schouwen aen, De boos’ in haer verderven, End’ hoe sy haren loon seer saen Ontfanghen en be-erven. Pause. 5. Om dat ghy tot Godt spreeckt eenpaer Ghy behoet my, o Heere, En op Godt in alle ghevaer Hoopt, en hem doet dees eere. Met geen schaden wert ghy beswaert: Noch gheen plaghen met allen En sullen u huys wel vermaert Gheensins dan over-vallen. 6. Hy gheeft den Enghelen bevel, Zijnde tot u gheneghen, Dats op u steedts acht hebben wel, In alle uwe weghen. Sy sullen in handen, dits klaer,
U draghen sijn besloten, Dat ghy niet vallen sult daer naer, Noch u aen den Steen stoten, 7. Ionge Leeuwen en Slangen wreet, Leeuwen en Draken mede, Sult ghy al sonder schaedt oft leet Onder den voeten treden. Want dit spreeckt Godt tot u voorwaer Om dat hy my vereeret, Ick sal hem helpen uyt noot swaer, Want mijn naem hy vermeeret. 8. Roept hy my aen, hy wert verhoort, In den noot sal ick wesen By hem t’aller tijdt van nu voort Hy werdt van my ghepresen. Ick sal hem vervullen seer goet, Met veel vrolijcke daghen, End’ hem oock laten smaken soet Mijn hulp nae mijn behagen.
Cookies on Poetry Cove