op de wijse Te mey als alle die vogelkens singhen.
Al ben ick in druck in groot ghequel Al is mijn lijden noch soo fel Rebel en wil ick niet wesen Godts Iock is soet // altoos so moet Sijnen naem worden ghepresen Al wordy eracht bespot versmaet Benijt beclapt verdruckt, ghehaet Hoet gaet, weest wel te vreden Maeckt gheen ghecrijt // verduldich sijt Tgheschiet al tot salicheden. Al slaet v Godt in ghelt in goet In naem in faem in vleesch in bloet In moet in v vijf sinnen Den Heer belijdt // lief volcht naer lijdt Tcrompt al wt rechter minnen. Inwendich draecht ghestadighen moet In lief in leet in suer in soet In goet te hebben en deruen Houdt dese leere in spoet in seere In leuen en in steruen. Druck lijden is den nauwen vaert Al die daer leyt ten Hemel waert Vermaert van God ghetreden Dit vast ghelooft // en volcht v hooft Als goy getroude leden. De wapenen daer Christus mede verwan Dat helsche serpent voor elcken man Niemant en canse volprijsen Door lijtsaemheyt // weest wel bereyt Te volghen sijn auijsen. Gheen dinck en van ons siele beuaen Als wy lijdtsamich blijuen staen Satan noch doot noch helle Onlijtsaemheyt // doet ons groot leyt
Sy brengt ons int ghequelle Gheen argher dinck dan eyghen wil T’maeckt tusschen Godt en ons gheschil Hoe staet ons goet in v loijen Als wil is versaeckt // dan wort God gesmaeckt. Dan sal de deuchde groijen Dit is dat rechte nieu ghebodt Dwelck Christus leerde, mensch ende God Door dwoort van lijdtsaemhede Hier sterft den mens // sijn lust sijn wens Sijn quade begheerte mede Dan wordet gheacht een gheestelijck man Die hem wel geestelijck oeffenen can Voortaen in Godts behaghen Wat God op leyt // met danckbaerheyt Te lijden sonder claghen. Ons Prins moest in sijn Glorie gaen Door druck door lijden ten is gheen waen Dees baen moest hy verkiesen Versmaet dit ghy // dat ick bely V siel suldy verliesen.
Cookies on Poetry Cove