opden thoon, van l’Almande Iolye. Daer was een ghebot ghedaen Van Augusto Keyser ghecoren, Dat elck mensch sou moeten gaen Ter stadt daer hy was gheboren, Om te gheuen het tribuyt, Dwelck den Keyser hadde gesworen, Dat hy dede roepen wt Met trompetten ouerluyt. Singt altesamen wie ghy sijt, Looft den Heere, doet hem eere, Singt altsamen wie ghy sijt Danct den Heer ghebenedijt Ioseph en Maria mede Hebben dit ghebot vernomen, Sy ginghen nae Nazareth haer stede Daer zy tsamen zijn ghecomen, Sy wilden ghehoorsaem zijn Het ghebot des Keysers sy dede Dat sy allen menschen fijn Souden een goet exempel zijn Singt altsamen. etc. Maria gaende (tis weert gheclaecht) Wesende bevrucht met Kinde Heeft naer een herberghe ghevraecht, Want haeren tijt was op dinde Daer en was niemant voorwaer, Die herberghe wilde dese Maecht Heymelijck oft openbaer,
Sy en vont gheen plaetse voor haer, Singt al t’samen wie ghy sijt, Looft den Heere, doet hem eere, Singt altsamen. Dit was Ioseph een groot cruys, Want hy Mariam zeer beminde, Hy leydense in een verlaten huys, Daer wert sy Moeder van haren Kinde, Godt almachtich bouen al Heere van Hemel en Aerde (tis confuys) Worde gheboren in eenen stal. Wie hoorde oyt sulck gheual. Singt altsamen wie ghy zijt, Danckt den Heere, doet hem eere, Singt altsamen. etc. Van couwe weende dat Kindeken teer Dden tijt die was so int saisoene, Het was seer cout, het vroos doen seer, Sy hadden oock van als van doene, Want helaes de Maghet reyn En hadde gheen ghevoederde cleeren, Om te decken s’Kindts ledekens cleyn, Die hem deden wee certeyn. Singt al tsamen wie ghy zijt, Looft den Heere etc. Maria viel op haer knien, Sy aenbadt haer Kindeken cleyne. Och wat vreucht moest haer gheschien Als sy sach die menscheyt reyne. Dit misterie contempleert Menschen wilt den Gheest insien V hooueerdije nv verneert, In schoon Kindeken iubileert, Singt altsamen wie ghy zijt,
Looft den Heere. etc. Sy nam haer Kindt ghebenedijt, In doeckelkens heeft sijt ghewonden, Sy leyt int crebbeken met jolijt, d’Welck zy inden stal vonden, Die stomme Beesten deden hem eer, Die doen aender crebben stonden, Sy verwermden sijn ledekens teer En bekenden haren Heer. Singt altsamen wie ghy sijt. Looft. Dinghelkens waren seer verblijt Bouen in s’Hemels throone, Sy loofden Godt ghebenedijt Van sijnder menscheyt schoone. Sy songhen peys op dat termijn Salder wesen opder aerden wijt Alle Christen Menschen fijn Die van goeden wille sijn, Singt altsamen wie ghy zijt. Looft. De Herderkens die daer laghen by Wachtende hare Schapen, Doen ontspronghen met herten sy, So sy hadden ligghen slapen, Sy liepen al naer Bethleem voort, En zy songhen, en zy spronghen bly, Om taenbidden dat eewich woort Louende Godt met een accoort, Singt altsamen wie ghy zijt. Looft. Verblijt al inden Heere, Staet op verweckt v sinnen, Prijst Godt en doet hem eer Met herten en met sinnen Gaet tot Bethleem eenen keer Inwendich inden Gheest van binnen,
Doet den nieuwen Coninck eer, Cust dat proper Kindeken teer, Singt altsamen etc. Laet ons toch dancbaer zijn Van alle Godts groote gauen, Die ons verlost heeft wter pijn, Als wy al waren slauen, Door zijn zoete menscheyt goet Is den Heere by ons ghecomen fijn In warachtich vleesch en bloet, Laet ons hierop draeghen moet, Singt altesamen wie ghy sijt, Looft den Heere doet hem eere. etc.
Cookies on Poetry Cove