Opden toon Swinters Somers euen groen.
Begint v hertekens op te heffen,
Verblijdt in uwer sielen grondt,
Wilt v weghen maken effen
Voor den Heere tallen stont
Ghy moet v siele maken reyne
Om hem tonyfanghen, tis meer dan noot
Al schijnt hy te wesen een Kindeken cleyne
Hy is een Heere van machte groot.
Gheen meerder gifte en connen wy crijghen
Dan die ons Godt ghegheuen heeft,
Laet ons Godt dancken sonder swijghen,
Al dat opter aerden leeft,
Ons Menscheyt heeft Godt aenghenomen,
Siet hoe vele hem dat heeft ghecost
Hy is seluer in persoon ghecomen,
Met sijnen bloede zijn wy verlost.
Compt en wilt altsamen smaken
Des Kindekens groote soeticheyt.
Doet v herteken naer hem haecken,
Bereyt v hert met vlieticheyt,
Door ootmoedicheyt wilt v verneren,
Met tranen wilt suyueren uwen gront,
Die in sijn Mensheyt contempleren,
Sijn Godtheyt maeckt de siel ghesont.
Als wy dese groote liefde aenmercken
So crijghen wy sondaren moet.
Laet ons insijnder liefde verstercken,
En dancken hem van sijn Menscheyt goet,
Die onse cranckheyt heeft ghedraghen
Hier beneden in s’werelts pleyn,
En ons altsamen die waren slauen
Vry ghemaeckt van sonden reyn.