Op die wijse. Met vreuchden willen wy singen
Solaes wil ick hanteren
Ende daer toe vrolijck sijn
Ende blijdelijck houeren
Met Iesus mijn minnekijn
Waerom soo willen wy trueren
Ten mach niet anders sijn
Ten sal niet langher dueren
Dat ick beducht sal sijn.
In alle die werelt wijde
En vinde ick niet soo goet
Dat my mach maken blijde
Dan Iesus mijn minneken soet
Hier om wil ick my gheuen
Hem te dienen tot alder tijt,
Soo worde ick van herten verheuen,
Ende eewelijck verblijt.
Hy is een Heer der heeren
Die schoonste die men vint
Ick wil my tot hem keeren
Want hy ons soo seere bemint
Gheen hert en mach versinnen
Die blijschap die hy heeft bereyt
Den ghenen die hem beminnen
Soo ons die schrifture dat seyt.
Hy is een bloem gheheeten
Seer suyuerlijck ende claer
Hy is soo hooghe gheseten
Al bouen der Enghelen schaer
Gheboren tot onser baten
Van eender Maghet claer
Sijnen naem is bouen honich graten
Wanneer sal ick aenschouwen
Sijn ouer claer aenschijn
Och mocht ick hem behouwen
Al in dat herte mijn,
Wat my mocht ouercomen
En soude ick achten niet
Waert so, het soude my vromen
Soo en had ick gheen verdriet.
O Godt wilt mijns ontfermen
Door uwen naeme fijn,
Ende wilt ons doch beschermen
Al vander hellen pijn
Ende wilt ons doch gheleyden
Ende brenghen int eewich rijck
Als wy van hier al scheyden
Dat bidden wy alle ghelijck, Amen.