Stemme: O! schoon Jonckvrouw mocht my ghebeuren. VAn aerden is de mensch ghenomen, En moet oock we'er tot aerde komen: Hier wel op acht Ghy dwaes gheslacht, Die na gheen saecken Als aerdtsch vermaecken, En weelde tracht.
2. Wat sal de mensch sijn rijckdom baten? Hy moet het doch al blijven laten, Sijn prael en pracht, Sal op een nacht Met hem vervallen, En niet met allen Meer zijn ghedacht.
3. Heeft dan de mensch wat goets bedreven Terwijle dat hy was in 't leven, En niet ghedaen Of 't mocht bestaen, Maer vrucht gedraghen Na Godts behagen, Soo sal 't wel gaen.
4. Soo sal sijn ziel altijdt na desen, In volle vreught by Gode wesen: Die met geschal, Van 't soet ghetal, Haer in sijn Troone, Met 's Levens-kroone Vereeren sal.
5. O grooten loon! Wie daer-en-teghen Gewandelt heeft op quade weghen, Die sal in pijn Ghedurigh zijn, En moeten wijcken, Met sijns ghelijcken, Van Godts aenschijn.
6. Laet my, o Heer! dit wel bedencken, En wilt my die ghenade schencken, Dat ick altijt,
Met rechten vlijt, Het quaedt mach weeren, Tot uwer eeren En mijn profijt.Amen. C. P. Rhijnenburgh.
Cookies on Poetry Cove