Medenblicker scharre-zoodtje

Stemme: Polephemus aen de strande, &c. 1. HEere, goe ghetrouwe Vader, Ick kom nader Voor u hooghe Majesteyt, Wilt doch achten op mijn reden En Ghebeden,

Na u groote goedigheyt.

2. Geef dat ick, na u Gheboden, Gheen Afgoden My op aerden maecken laet, Maer dat ick mach gaen ter deghen In u weghen, En den valschen Godts-dienst haet.

3. Hoed mijn tongh voor leugen-spreken, Valsche treken, Die ghy hooghelijck verbiet: Want de mondt geneyght tot lieghen En bedrieghen, Baret eeuwigh Ziel-verdriet.

4. Ghy en wilt oock in dit leven My niet gheven Al te groot of kleyn-beslagh, Maer verleen my middelmatigh, Dat ick statich, En met eeren, leven mach.

5. Grooten rijckdom maeckt hooghmoedigh, Overvloedigh Ick van u gantsch niet begeer; Anders mocht ick my op-maecken, V versaecken, Segghende: Wie is de Heer?

6. Ghy en wilt my oock niet laten, Boven maten, Met armoede zijn besocht, Anders mocht ick zijn ghenegen, Dinghen plegen Die ick noyt mijn leven docht.

7. Ick mocht teghen u beveelen Lopen steelen, Loeren op mijns naesten goedt: Daerom laet my, Godt der vromen, Doch niet komen Tot ghebreck, noch overvloedt.

8. Want armoede, swaer om daghen, Maeckt verslaghen, Overvloedt verheft ghewis: Wilt my dan alleene schencken, En bedencken Met soo veel my noodigh is.

9. Hierom bidd' ick u, o Heere! En begheere Dat ghy my de gunste doet, Dat ick dit van u verwerve Eer ick sterve, Daer ick een-mael henen moet. C. P. Rhijnenburgh. 't Is noyt te degen.